डेबिट कार्ड वा क्रेडिट कार्ड दुवैमा कोरिएका प्रत्येक नम्बरको अर्थ हुन्छ । यी कार्डका नम्बरलाई कोड गर्ने गरिन्छ । यिनै नम्बरमा तपाइँको अकाउन्ट (बैंक खाता) का साथसाथै यी कार्ड जारी गर्ने कम्पनीको पनि सम्पूर्ण विवरण लुकेको हुन्छ ।

१. डेबिट कार्ड र क्रेडिट कार्डमा रहेको पहिलो नम्बरले त्यो कम्पनीलाई जनाउँदछ, जसले कार्ड जारी गर्छ । जस्तै बैंक, वित्तीय संस्था र अन्य कम्पनी । यसलाई मेजर इन्डस्ट्री आइडेन्टिफाएर (एमआईआई) भनिन्छ । यो नम्बर अलग–अलग इन्डस्ट्रीका लागि अलग–अलग तोकिएको हुन्छ । 

एमआईआई जारी गर्ने इन्डस्ट्रीमा आईएसओ इन्डस्ट्री, एयरलायन्स, बैंकिङ तथा वित्तीय संस्था, बैंक तथा मर्चेन्ट कम्पनी र अन्य हुन्छन् ।

२. डेबिट कार्ड र क्रेडिट कार्डको पहिलो ६ वटा नम्बरले कार्ड जारी गर्ने कम्पनीलाई दर्शाउँछ । यसलाई इस्युअर आइडेन्टिफिकेसन नम्बर भनिन्छ। जस्तै अमेरिकन एक्सप्रेस, भिजा, मास्टर कार्ड, मेइस्ट्रो, डिस्कभर आदि । 

३. सातौँ नम्बरदेखि लिएर एन–१ (कार्डको अन्तिम नम्बरलाई छोडेर) सम्मका नम्बर तपाइँको बैंक खाताको नम्बरसँग सम्बन्ध रहेको हुन्छ । यी नम्बरले तपाइँको बैंक खातासँग हुबहु मेल खाँदैन तर खाताको नम्बरसँग सम्बन्ध भने राखेको हुन्छ ।

४. डेबिट र क्रेडिट कार्डमा लेखिएको अन्तिम नम्बर चेक डिजिटको नामबाट लिइन्छ । यसका माध्यमबाट कार्ड मान्यताप्राप्त हो कि होइन भनेर थाहा पाइन्छ । – एजेन्सी