पुर्नबीमा कम्पनीले लाभांश वितरण गर्न पाउने

नेपाल पुर्नबीमा कम्पनी लिमिटेडले  आगामी आर्थिक वर्षदेखि सेयरधनीलाई लाभांश वितरण गर्न पाउने भएको छ । कम्पनीका कर्मचारीले नाफाबाट बोनस पाइरहे पनि संस्थापक सेयरधनीले पाएका थिएनन । प्राथमिक सेयर (आईपीओ) निष्कासन गरेपछि कम्पनीले लाभांश वितरण गर्न पाउने भएको हो । 

नेपालमा पुर्नबीमा व्यवसाय गर्न स्थापना भएको कम्पनीमा सरकारको ४४, बिमा कम्पनीहरुको ३९.९३ र सर्वसाधारणको १६ प्रतिशत स्वामित्व हुने गरी लगानी संरचना तयार पारिएको छ ।  आईपीओ निष्कासपछि नेपाल पुर्नबीमाको पुँजी १० अर्ब रुपैयाँ पुग्ने छ । हाल ८ अर्ब ४० करोड रुपैयाँ पुँजी छ । 

कम्पनीले चैत ४ गतेदेखि आईपीओ निष्कासन गर्ने भएको छ । कम्पनीले चुक्तापुँजीको १६ प्रतिशत अर्थात १ अर्ब ६० करोड रुपैयाँ बराबरको १ करोड ६० लाख कित्ता निष्कासन गर्न लागेको हो । 

 न्युनतम १० देखि  १० हजार कित्तासम्म आवेदन दिन पाइने कम्पनीले जनाएको छ । कम्पनीले नेपाल इक्रा लिमिटेडबाट आईपीओ ग्रेड २ प्रमाणपत्र पाएको छ । 
पुर्नबीमाले निष्कासन गर्ने आईपीओको ६० करोड नागरिक लगानी कोष र मेगा क्यापिटल मार्केट्स लिमिटेडले २० करोड रुपैयाँ प्रत्याभूति (अण्डरराइटिङ) गर्ने छन ।