एक साताभित्रै एकैदिनमा तीन पटक नकारात्मक सर्किट लागेर बजार बन्द भएपछि यतिबेला कतिपय लगानीकर्तामा त्रास नै बढेको छ।

मंगलबार फाल्गुन २७ गते शेयर बजारमा भीषण गिरावट आएको छ ।   बजार ६ प्रतिशतले घटेपछि नेपाल स्टक एक्सचेञ्जले सर्किट ब्रेक लगाएर बजार बन्द गराएको छ ।

स्टकका अनुसार आज बजार ८६.३९ अंकले घटेर १ हजार ३४९ दशमलव ३१ बिन्दुमा बन्द भएको छ। मंगलबारको गिरावटसँगै नेप्से सूचक फागुन १ गतेको सूचक नजिक पुगेको छ । १ गते नेप्से सूचक १ हजार ३४४ अंकमा रहेको थियो।

फागुन १५ गतेसम्म लगातार बढेर नेप्से परिसूचक १ हजार ६३२ अंकसम्म पुगेको थियो। सो पछिका दिनमा तीव्र गतिमा ओरालो लागेर २८३ अंक घटेपछि आज नेप्से १ बिन्दुमा ३४९ अंकमा झरिसकेको छ। बजार घटेसँगै समग्र बजार पूँजीकरण १७ खर्ब २३ अर्ब ९१ करोड रुपैयाँमा खुम्चिएको छ।

कोरोना भाइरसका कारण विश्व अर्थतन्त्र प्रभावित बन्दा चीन र भारतसहितका अन्तर्राष्ट्रिय पूँजीबजारहरु घटिरहेका छन्। तेलको मूल्य घटेको छ भने सुन र डलर भण्डारण गर्न थाल्दा दुबैको भाउ बढेको बढ्यै छ।