काठमाडौं । यतिबेला सिडिएससीले ल्याएको मेरो सेयरमा निरन्तर देखिएको समस्याका कारण सेयर लगानीकर्ता निकै आजित भएका छन् ।

मेरो सेयरबाट सेयर लगानीकर्ताले आईपीओ, एफपीओ, हकप्रद, ऋणपत्रमा आवेदन दिने गरेका छन् । आफ्नो पोर्टफोलियो थाहा पाउने गरेका छन् । तर मेरो सेयर नचल्दा लगानीकर्ता निकै आक्रोशित भएका छन् ।

मेरो सेयर दिउँसो मात्रै होइन, साँझ, राति, बिहान पनि नचल्दा लगानीकर्ता आजित भएका हुन् । यतिबेला लगानीकर्ता मात्रै नभएर आफू पनि यसले निकै हैरानीमा परेको सिडिएससीका प्रमुख कार्यकारी अधिकृत (सिइओ) पूर्ण प्रसाद आचार्यले बताए ।

सिइओ आचार्यका अनुसार भेन्डर कम्पनी एफवान सफ्टलाई के कारण मेरो सेयर नचलेको भनेर लिखित प्रस्टिकरण समेत सोधिएको छ । 

सिइओ आचार्यले आफ्नो समस्याको कारण कुनै पनि लगानीकर्ता क्लोज आउटमा नपर्ने प्रतिबद्धता जनाएका छन् ।

पहिला थोरै लगानीकर्ता हुँदा बनाएको सिस्टम अहिले मेरो सेयर प्रयोगकर्ता ११ लाखको हाराहारीमा पुगेको हुँदा पनि समस्या देखिएको बताइन थालेको छ ।

भेन्डर कम्पनीले सिस्टममा देखिएको समस्या समाधान गरे भनेपनि त्यसले एसेप्ट नगरेको देखिएको छ । यो सिस्टमलाई अपग्रेड गर्ने तयारी रहेको उनको दावी छ ।