आपतमा परेकाहरुको सहयोगका लागि अहिले उनको टिममा ५५ जनाभन्दा बढी मनकारीहरु सक्रिय छन् । १८ जनाले हटलाइनमार्फत आएको फोन अनुसार व्यक्तिको समस्या बुझ्ने, ७ जनाले सामाजिक सञ्जालमा आएको अनुरोध हेर्ने, अस्पतालहरुमा हरेक दुई वा तीन घन्टामा फोन गर्दै उपलब्ध भएको बेड, अक्सिजनको अवस्था बुझेर अर्को ७ जनाको आईटी समूहलाई अपडेट गर्ने काम गर्दै आएको छ । यो समूहले आएको अनुरोध संख्या, त्यसको प्रकार, आईसीयू, भेन्टिलेटर बेड, अक्सिजन, गाडी पाउनेको संख्या वेबसाइटमा अपडेट गर्छ ।

१५ जनाको मेडिकल टिमले अनुरोध आएका संक्रमितको अवस्था अनुसार परामर्श दिने गर्छ । सामान्य रुघाखोकी, हाछ्यूँ, हल्का ज्वरो आएको व्यक्तिलाई घरमै आइसोलेसन बस्न भनिन्छ, सामान्य अक्सिजन कम भएकालाई अक्सिजन लिएर बस्न परामर्श दिइन्छ । एम्बुलेन्स, गाडीको व्यवस्थासमेत जुटाइदिन यो समूहभित्र केही जनाको टिम सक्रिय छ ।